Дунд голыг энэ зуны эхнээс цэвэрлэж буй.

Үүнээс улбаалан голын түвшин эрс буурч, ихээр бохирдсон хэмээн иргэд шүүмжилж байгаа юм. Иймд Улаанбаатар хотын Захирагчийн Ажлын Алба(УБЗАА)-наас дараах тайлбарыг өгөв.

УБЗАА-ны Хотын инженерийн байгууламжийн хэлтсийн дарга М.Балдандорж "Зургаадугаар сараас эхэлсэн гол цэвэрлэх ажил өнөөдрийн байдлаар 94-95 хувьтай байна. Бид таван аж ахуйн нэгжтэй хамтарч ажиллаж байгаа. Тэдний ажил бага зэрэг удаашралтай байна.

Дунд гол нь үертэй үед голдоо багтахгүй, бусад үед 2-3 метрийн өргөнтэй урсдаг. Харин бид 30-40 метр, зарим газартаа 50 метр өндөртэй лаг хагшаасыг цэвэрлэснээр татарсан мэт, голын ус байхгүй мэт харагдаад байгаа. Мөн олон байгууллага газар зэрэг ухсанаас хонхор гүдгэр үүсэж, тогтоол хэлбэрээр байгаад замагших процесс гарч байна.

Түүнчлэн S'Outlet орчмын үерийн хамгаалалтын барилга байгууламжийг хийхийн тулд голын урсцыг багасгах, усны хэмжээг боох арга хэмжээг давхар хийж байгаа. Сүүлийн хоёр сар хийгдэж буй эдгээр ажил олон хүчин зүйлээс шалтгаалж, иргэдийн бухимдлыг төрүүлж байна. Энэ нь ч зайлшгүй болов уу.

Хотгор төвгөр үүссэн, дээрээс нь усны хэмжээг боогоод багасгасан учраас замагшиж байгаа. Ойрын 14 хоногт голын хэвгийгээ бүрэн гаргана. S'Outlet орчмын үерийн хамгаалалтын барилга байгууламжийн ажил дуусахаар урсгал бүрэн чөлөөлөгдөнө" гэлээ