Соёлын биет өв худалдан борлуулсан хэргийг илрүүлсэн талаар Цагдаагийн Ерөнхий Газраас мэдээллээ. 

Тодруулбал “Монголын Бурхан шашинтны төв Гандантэгчэнлин хийд”-ийн орчим газар, шорооны ажил хийж байх үедээ иргэн Ц, З, О, Б нарын бүлэг этгээд түүх, соёлын дурсгалт зүйл, соёлын биет өвд хамаарах их хэмжээний мөнгөн зоос, мөнгөн ембүү, мөнгөн гулдмай зэргийг техник хэрэгсэл ашиглан олж, эртний эдлэлийн худалдаа эрхэлдэг “А”-д худалдсан үйлдлийг Эрүүгийн цагдаагийн албаны алба хаагчид илрүүлжээ. 

Дээрх этгээдүүдийн орон байр, тээврийн хэрэгсэлд хийсэн нэгжлэгээр

• мөнгөн зоос /ёншгойт/ 1,184 ширхэг
• мөнгөн ембүү 29 ширхэг
• мөнгөн гулдмай нэг ширхэг
• хууль бусаар олсон байж болзошгүй 65,000 ам.доллар, 92,990,000 төгрөгийг түр хураан авч мөрдөн шалгах ажиллагааг үргэлжлүүлэн явуулж байна.

Уг үйлдэл нь Монгол Улсын Эрүүгийн хуулийн тусгай ангийн 25.5 дугаар зүйлд заасан “Соёлын биет өвийн хууль бус худалдааг зохион байгуулах, зуучлах” гэмт хэргийн шинжийг агуулж байгаа ба их хэмжээний мөнгө угаах гэмт хэрэг үйлдсэн байж болзошгүй нөхцөл байдлууд тогтоогдоод байгаа юм.