Өнгөрөгч сарын 28 /2024.06.28/-ны өдөр буюу зургаа хоногийн өмнө Турк улсын Истанбул хотын Шишли гэх дүүрэгт хүн амины аймшигт хэрэг гарсан талаар тус улсын хэвлэлүүд мэдээлжээ. Тодруулбал,тус улсад амьдардаг монголчууд архидан согтуурч нэгнийхээ аминд хүрсэн байна. Эх сурвалжийн мэдээлж буйгаар тэд Туркд очоод дөрвөн жилийн хугацаа өнгөрч байсан гэжээ.

-ТУХАЙН ӨДӨР НАЙЗЫНДАА ЗОЧЛОН ОРОЙН ХООЛ ИДЭХЭЭР ОЧЖЭЭ-

Монгол улсын иргэн Б.Амарсанаа Шишли дүүргийн гудамжинд байрлах нэгэн орон сууцанд амьдардаг найз А.Төрболд түүний эхнэр Б.Дархисүрэн нарынд оройн хоол идэхээр зочилжээ. Тэд хооллож, архи ууцгаасан ба энэ үеэр гэрийн эзэн болох А.Төрболд дэлгүүр рүү архинд явсан хойгуур найз Б.Амарсанаа нь А.Төрболдын эхнэр Б.Дархисүрэнг хүчиндэхийг завдсан байна. Тэрээр найзынхаа эхнэрийг бэлхүүсээр нь тэврэн бэлгийн дарамт үзүүлж хүчээр унтлагын өрөө рүү авч явсан байна. Тэр үед эмэгтэй эсэргүүцэл үзүүлж тэдний хооронд зодоон болжээ.

-НӨХРИЙГ НЬ ДЭЛГҮҮР ЛҮҮ АРХИНД ЯВСАН ХОЙГУУР НАЙЗ НЬ ЭХНЭРИЙГ НЬ ХҮЧИНДЭХИЙГ ЗАВДСАН ГЭЖ МЭДЭЭЛЖЭЭ-

Туркийн Сабах сонины мэдээлснээр, эмэгтэй эсэргүүцэл үзүүлж байхдаа толгойгоороо хана мөргөн ухаан алдаж унасан гэжээ. Тэр үед архинд явсан нөхөр нь гэртээ ирж болсон үйл явдлыг хараад уурлан ширээн дээрээс талхны хутга авч найзынхаа нуруун тус хэсэгт нь хутгалж хүнд гэмтээсэн байна. Ойр хавийн хөршүүд нь хүмүүсийн орилолдох чимээнээр цагдаагийн байгууллагад ханджээ.

Дуудлагын дагуу хэргийн газарт цагдаа болон эмнэлгийн бүрэлдэхүүн түргэн хугацаанд ирсэн ч Б.Амарсанаа аль хэдийн амьсгал хураасан байжээ. Цагдаа нар А.Төрболд болон түүний эхнэрийг  хэргийн газарт саатуулан авч явж буй дүрс мөн цахим орчин тарсан байна.

Мөрдөн байцаах албаныхан хэргийн газарт прокурорын ажиллагаа явуулсны дараа Б.Амарсанаагийн цогцсыг Бахчелиевлер дэх Шүүх эмнэлгийн хүрээлэнд аваачжээ. Мөн хэрэгт ашигласан хутгыг цагдаа нар хураан авчэхнэр, нөхөр болох Б.Дархисүрэн, Ө.Төрболд нарыг "санаатай хүн амины хэрэг үйлдсэн" гэх үндэслэлээр шүүхэд шилжүүлээд байгаа талаар мэдээллээ.