Даваа гарагт Өмнөд Солонгосын Гёнги мужийн Хвасон хотод оршдог литийн батарейн үйлдвэр гал гарч, хамгийн цөөндөө 22 ажилчин амь үрэгджээ.

Амь үрэгдсэн хүмүүсийн 20 нь гадаадын ажилчид байсан байна.

Өчигдөр оройн 09:00 цагийн байдлаар аврагчид сураггүй болсон нэг хүнийг үргэлжлүүлэн хайж байжээ.

Өөр хоёр ажилчин хүнд, зургаан ажилчин хөнгөн шархадсан байна.

Амь үрэгдсэн 22 ажилчны 18 нь Хятад, хоёр нь Өмнөд Солонгос, нэг нь Лаос улсын иргэд байжээ.

Үлдсэн нэг хохирогчийн цогцос их хэмжээгээр түлэгдсэн тул ДНХ шинжилгээгээр харьяаллыг тогтоохоор болсон гэнэ.

Гал түймэр Даваа гарагийн өглөөний 10:30 цагийн үед үйлдвэрийн хоёрдугаар давхарт гарчээ.

Aricell компанийн эзэмшлийн нийт 11 үйлдвэрийн нэг болох энэ үйлдвэрт шинэ литийн батарейг шалгах, савлах үйл ажиллагаа явагддаг юм байна. Гал гарах үеэр энд 35,000 орчим ширхэг батарей хадгалагдаж байжээ.

Гал сөнөөгчид өдрийн 3:10 цагийн үед түймрийн тархалтыг зогсоож чадсан байна. Үйлдвэрт их хэмжээний шатамхай, тэсрэмтгий материал байсан тул галыг уламжлалт арга техникээр унтраахад бэрхшээл тулгарсныг албаныхан ярьсан юм.

Өчигдөр үдээс хойш Өмнөд Солонгосын засгийн газар шуурхай хуралдаж, гамшгийн хариу арга хэмжээний талаар хэлэлцжээ.

Өмнөд Солонгосын ерөнхийлөгч Юн Сүк Ёл оройн 7:00 цагийн үед үйлдвэрийн байранд ирж, гамшгийн нөхцөл байдалтай танилцсан байна.

Тус улсын гадаад хэргийн яам иргэд нь хохирсон улс орнуудын элчин сайдын яамдтай хамтран ажиллаж байгаагаа мэдээлжээ.

Эх сурвалж: Yonhap News