Иргэний агаарын тээврийн “Изинис Эйрвэйз” компани 2024 оны долдугаар сарын 10-ны өдрөөс эхлэн Улаанбаатар-Прага-Улаанбаатар чиглэлд долоо хоногт хоёр удаа шууд нислэг үйлдэхээр болсон байна.

Ингэснээр Чех улсад амьдарч буй 13,000 гаруй монгол иргэн төдийгүй Европт ажиллаж, сурч, суурьшиж буй иргэд эх орондоо зорчих, Монголыг зорих жуулчдын тоо нэмэгдэх, цаг, зардал хэмнэх боломж бүрдэнэ гэж тооцоолжээ.

Үүнээс гадна хоёр талын худалдаа, эдийн засгийн хамтын ажиллагаа, ачаа эргэлтийн хэмжээг нэмэгдүүлэх ач холбогдолтой байна.

“Агаарын харилцааны тухай Монгол Улсын Засгийн газар болон Бүгд Найрамдах Чех Улсын Засгийн газар хоорондын хэлэлцээр”-ийн дагуу уг нислэгийг эхлүүлэхээр болжээ.