Одоогоос 21 жилийн өмнө нэг Монгол иргэн жилд дунджаар 12 өндөг иддэг байсан бол өнөөдөр 180-200 ширхэгт хүрчээ. Өндөгний хэрэгцээг дотоодоос 100 хувь хангах амбиц манай улсад бий. Одоогоор үндэсний үйлдвэрлэгчид дотоодын зах зээлийн 60 хувийг хангаж байна.

Он гарснаас хойш 10.8 сая ширхэг өндөг импортолсон нь өмнөх оны мөн үеэс 86.7 хувиар буурсан үзүүлэлттэй байгаа юм. Мөн өргөн хэрэглээний голлох хүнсний нэг цагаан будаа 10.5 мянган тонныг импортолсон нь өмнөх оны мөн үетэй харьцуулахад 50.6 хувиар буурсан дүнтэй байна.

Гаалийн ерөнхий газрын мэдээлснээр энэ оны эхний таван сарын байдлаар нийт 4395.2 сая ам.долларын бараа, түүхий эд оруулсан нь 2023 оны мөн үеэс 932.3 сая ам.доллароор буюу 26.9 хувиар өссөн дүнтэй байгаа ч зарим нэр төрлийн бараа бүтээгдэхүүн ийн буурчээ. Харин гурилын импортын татварыг тэглэснээс хойш нийлүүлэлт өсөж 13,9 мянган тоннд хүрсэн нь өмнөх оны мөн үеэс 155.9 дахин өссөн байна.