Монгол Улсын Их Хурлын сонгуулийн тухай хуулийн 20 дугаар зүйлийн 20.21 дэх хэсэгт “Энэ хуульд заасан журмын дагуу Сонгуулийн ерөнхий хороонд бүртгүүлсэн нам, эвсэл, бие даан нэр дэвшигч, төрийн бус байгууллагын төлөөлөл сонгогчдын нэрийн жагсаалт үйлдэх ажиллагаатай танилцаж болно” гэж заасны дагуу Улсын бүртгэлийн ерөнхий газраас 2024 оны 06 дугаар сарын 05-ны өдөр нам, эвсэл болон төрийн бус байгууллагын төлөөллийг хүлээн авч, уулзалт зохион байгуулж, сонгогчдын нэрийн жагсаалт үйлдэх ажиллагаатай танилцууллаа.

Тус арга хэмжээнд 18 нам, 2 эвсэл, 1 төрийн бус байгууллагын нийт 42 төлөөлөл оролцох хүсэлтээ ирүүлснээс 17 нам, 2 эвсэл, 1 төрийн бус байгууллагын нийт 27 төлөөлөл идэвх санаачилгатай оролцож, шаардлагатай мэдээ мэдээллийг нээлттэйгээр авч, өөрийн хүссэн асуултад тодорхой хариулт авч оролцов.

Мөн ЦХХХЯ, СЕХ, ТЕГ, ЦЕГ, Үндэсний дата төв, И-Монгол академи зэрэг төрийн байгууллагын холбогдох албан хаагчид Монгол Улсын Их Хурлын сонгуулийн тухай хууль, Хүний хувийн мэдээлэл хамгаалах тухай хууль, Нийтийн мэдээллийн ил тод байдлын тухай хууль, Төрийн болон албаны нууцын тухай хуульд заасан чиг үүргийг хэрэгжүүлэн оролцсон юм.

Уг арга хэмжээний хүрээнд Улсын бүртгэлийн ерөнхий газрын дарга Д.Дэлгэрсайхан оролцогчдод сонгуулийн нэрийн жагсаалт үйлдэх ажиллагааны талаар танилцуулга хийсэн ба “Сонгуулийн хэсэг байгуулсан тухай сум, дүүргийн иргэдийн төлөөлөгчдийн хурлын тогтоол хүлээн авч, сонгуулийн хэсэг байгуулах, сонгогчдын нэрийн жагсаалтын цахим хувилбар, түүнд нэмэлт тэмдэглэгээ хийх, сонгогчдын нэрийн жагсаалтыг нягтлан шалгах, сонгогчийн бүртгэлийн программ хангамжийн танилцуулга, сонгогчдын нэрийн жагсаалтад лавлагаагаар орсон өөрчлөлтийг тусгах” зэрэг үйл ажиллагааг бодит кэйс дээр тулгуурлан танилцуулж, оролцогчдоос асуусан асуултад хариулт өглөө.

Түүнчлэн тус арга хэмжээнд оролцогч нам, эвсэл, төрийн бус байгууллагын төлөөллөөс ирүүлсэн хүсэлтийн дагуу иргэн, эд хөрөнгийн эрхийн улсын бүртгэл, архивын чиглэлээр холбогдох мэдээллийг газар дээр нь тэднийг байлцуулан нягтлан шалгаж, зөвлөгөө мэдээллийг өгснөөр өнөөдрийн үйл ажиллагаа өндөрлөлөө хэмээн УБЕГ-аас мэдээлэв.