Швед улс өчигдөр Украинд үзүүлэх $1.23 тэрбумын зэр зэвсгийн тусламжаа зарлажээ.

Уг багцад дайсны агаарын цохилтоос эрт сэрэмжлүүлэх чадвартай ASC 890 нисэх онгоц багтсан байна.

ASC 890 онгоцны тусламжтай Украины армийн “агаарын болон тэнгисийн байг илүү хол зайнаас илрүүлж, эсэргүүцэх хүчин чадал эрс нэмэгдэнэ” гэж Шведийн батлан хамгаалахын сайд Пол Йонсон мэдэгджээ.

ASC 890 (бас Saab 340 гэж нэрлэдэг) онгоц нь эх бие дээрээ аварга загасны сэрвээ шиг бэхлэгдсэн том радартай “Airborne Early Warning and Control” ангиллын нисэх онгоц юм.

Уг онгоц 400 км-ийн хүрээнд дайсны агаарын довтолгоог хянах чадвартай бөгөөд одоо ОХУ-ын армийн Украинд ашиглаж буй A-50 онгоцтой ижил хүчин чадалтай.

F-16 сөнөөгч онгоц, агаарын довтолгооноос хамгаалах газар-агаар ангиллын пуужингийн системүүд зэрэг Өрнөдийн зэвсэг техникүүдтэй хоршиж ажиллах чадвартай тул хамрах хүрээ нь илүү томрох боломжтой юм.

Бас нисгэгчгүй онгоцнууд, далавчит пуужингуудыг илрүүлэх чадвартай ажээ.

Мягмар гарагт Бельгийн засгийн газар АНУ-д үйлдвэрлэсэн 30 ширхэг F-16 сөнөөгч онгоцыг Украинд илгээх болсноо зарласан юм. Онгоцнуудын эхний хэсэг энэ оны сүүлээр, үлдсэн нь дөрвөн жилийн дотор нийлүүлэгдэнэ. Ингэхдээ Бельгийн эрх баригчид онгоцнуудыг ОХУ-ын нутаг дэвсгэр дээгүүр нисгэхгүй гэсэн нөхцөл тавьжээ.

Ингэснээр холбоотнуудын Украинд өгөхөөр амласан F-16 онгоцнуудын нийт тоо 85 болж байна.

Бельгиэс гадна Швед, Нидерланд, Дани, Норвеги улсууд ийм сөнөөгч онгоц Украинд нийлүүлэхээр болоод байгаа.

Шведийн засгийн газрын өчигдөр зарласан тусламжийн багцад явган цэргийн хуягт машинууд, дунд тусгалын агаар-агаар ангиллын пуужингууд, их бууны сумнууд зэрэг бусад зэр зэвсэг багтжээ.

Эх сурвалж: Reuters