"Олон Улсын Хүүхдийн эрхийг хамгаалах өдөр”-ийг тохиолдуулан цагдаа, дотоодын цэргийн байгууллагаас гурав дахь жилдээ “Хүүхэд таныг хамгаалъя” нээлттэй өдөрлөгийг амжилттай зохион байгууллаа.


Өдөрлөг өнөөдөр /2024.05.30/ Жанжин Д.Сүхбаатарын талбайд болж хүүхэд, багачууд, эцэг эх, асран хамгаалагчид өргөнөөр оролцлоо


Энэхүү арга хэмжээний нээлтэд Монгол Улсын Их Хурал, Засгийн газрын гишүүн, Цахим хөгжил, харилцаа холбооны сайд Н.Учрал, Хууль зүй, дотоод хэргийн дэд сайд Б.Солонгоо, Цагдаагийн ерөнхий газрын дарга, Дотоодын цэргийн командлагч, бригадын генерал Т.Сүхболд, Цагдаагийн ерөнхий газрын Дэд дарга, цагдаагийн хурандаа Т.Ганзориг, Цагдаагийн ерөнхий газрын Дэд бөгөөд Нийслэлийн цагдаагийн удирдах газрын дарга, цагдаагийн хурандаа О.Ганбат, Нийслэлийн Иргэдийн төлөөлөгчдийн Хурлын дарга Ж.Батбаясгалан, Харилцаа холбооны зохицуулах хорооны дарга Г.Чинзориг болон цагдаа, дотоодын цэргийн алба хаагч, тэдний гэр бүл, иргэд, олон нийт, хүүхэд багачууд оролцлоо.


"Хүүхэд таныг хамгаалъя” нээлттэй өдөрлөгийн үеэр хүүхэд багачуудын дунд сагсан бөмбөгийн 3x3, хийн буу, дартс, АХА тэмцээнүүдийг тус тус зохион байгуулж, аваргуудаа шалгаруулсан юм. Мөн нохойтой алба хаагчийн үзүүлбэр, гардан тулаан, автомашины үзэсгэлэнг сонирхуулан, жолоодох эрхийн лавлагаа, үнэмлэх олгох, хүчинтэй хугацааг сунгуулах, жолоодох эрхээ хасуулсан иргэдэд сургалт явуулах, галт зэвсэг, хувийн хамгаалалт, аюултай ачаа тээш тээвэрлэх зөвшөөрлийг хэрхэн авах талаар зөвлөгөө, мэдээлэл өгч олон төрлийн үйлчилгээг нэг дор үзүүлсэн үйл ажиллагаа болж өндөрлөлөө.