Эверестийн оргилд хөтөчгүйгээр авирсан монголын хоёр уулчин тус оргилын 4-р кемпээс дээш яваад 8000 метрийн өндөрт ор сураггүй алга болж, хоёр хоногийн турш холбоо бариагүй байгаа юм. Улмаар хөтөч үйлчилгээний “8K Expeditions” компани аврах ажиллагааг явганаар эхлүүлсэн талаар бид өмнө нь мэдээлсэн. Дэлгэрэнгүйг ЭНД ДАРЖ харна уу.

Тэгвэл хамгийн сүүлийн мэдээллээр, “Сураггүй алга болсон хүмүүс нь 31 настай Цэдэндамбын Өсөхжаргал, 53 настай Лхагважавын Пүрэвсүрэн нар болох эрэгтэй болохыг тогтоосон гэж Эверестийн Аялал жуулчлалын газраас мэдээллээ. Тус хэлтэс нь Эверестийн бааз дахь хээрийн албанаас болсон явдлын тухай мэдэгдлийг хүлээн авсан байна.

Уулчдыг хамгийн сүүлд тавдугаар сарын 13-ны өглөөний 8:45 цагт Эверестийн дөрөв дэх баазаас оргил руу гарч байхыг өөр нэг экспедицийн багийнхан харсан гэж мэдээллээ. Одоогоор аврах албаныхны тусламжтайгаар болзошгүй газруудад эрэн хайх ажиллагаа явагдаж байна.

Сануулахад, “4-р баазаас дээш нэмэлт хүчилтөрөгч, шерпа дэмжлэггүйгээр авирч байсан монголын хоёр уулчин хамгийн сүүлд ням гарагийн 19:30 цагт баазтай радио холбоо барьж, “маргааш өглөө оргилдох төлөвлөгөөтэй байна” гэдгээ хэлсэн байдаг. Улмаар тэднийг алга болсонд тооцож, сураггүй болсон хугацааг хоёр өдөр гэж зарлахдаа Ням гарагийг /2024.05.12/ 19:30 цагаар тооцоолсон юм. Гэтэл дээр дурдсанчлан монгол уулчдыг Даваа гарагийн /2024.05.13/ өглөөний 8:45 цагт оргил руу гарахаар авчирч байхыг экспедицийн багийнхан харжээ.