Засгийн газрын хуралдаанаас гарсан зарим шийдвэрийн талаар  танилцууллаа. Энэ ЗГХЭГ-ын дарга Д.Амарбаясгалан “Гурил, тэжээлийн импортыг тэглэх хууль батлагдсантай холбоотой журам батлагдсан байсан. Энэ долоо хоногоос хууль хэрэгжиж эхэлнэ. Импортын бараа бүтээгдэхүүний жагсаалтад төрөл зүйл нэмэх асуудлыг тогтоолоороо баталлаа. Жагсаалтад Улаанбуудайн гурил, малын тэжээлийг багтааж байгаа. Өнөөдрөөс Монгол Улсын бүх хилийн боомтоор гурил, тэжээл татваргүй орж ирэх нөхцөл хангагдсан. Үүнтэй холбоотойгоор Засгийн газраас найман зүйл заалттай үүрэг өгсөн. Нэгдүгээрт, дотоодын үйлдвэрлэлийн аюулгүй нөхцөлийг хангах, импортын гурил, тэжээлийн хэмжээг тогтоох асуудлыг Засгийн газар зохицуулах эрхээ авсан. Хоёрдугаарт, дотоодын улаан буудайн үйлдвэрийг дэмжихээр жил бүр 100 мянган тонн улаан буудай худалдаж авахаар болсон. Гуравдугаарт, улаан буудайн тариалагчид хадгалах сав байдаггүй учир гурлийн үйлдвэрт улаан буудайгаа өгөхөөс өөр сонголтгүй. Төрийн мэдэлд байгаа 182 мянган тонныг хадгалах зориулалт бүхий савыг улаан буудай тариалагч нарт зориулалтын дагуу ажиллуулах нөхцөлийг нээхийг ХХААХҮ-ийн сайдад даалгасан ” гэв.