"МИАТ" ТӨХК өнөөдөр/2024.04.25/ дэлхийд тэргүүлэгч агаарын тээврийн "AerCap" компаниас хоёр дахь БОИНГ 787-9 Dreamliner агаарын хөлгөө хүлээн авчээ.

Эхний агаарын хөлгийг "Khubilai Khaan" гэж нэрлэсэн бол хоёр дахь хөлгийг "Munkh Khaan" гэжээ.

Одоогоор тус онгоцоор Истанбул, Франкфурт, Сөүл чиглэлд нислэг үйлдэж, цаашид АНУ, Сингапур, Австрали руу шууд нислэг үйлдэхээр төлөвлөсөн байна.

БОИНГ 787-9 Dreamliner агаарын хөлөг нь хурдтай, алслалт сайтай тул тив алгассан холын зайн нислэгийг зогсолгүй шууд үйлдэх боломжтой. Дэлхийн зогсолтгүй шууд үйлддэг холын зайн таван чиглэлийн нислэгийн гурвыг тус агаарын хөлгөөр үйлддэг байна.

Агаарын хөлгийн техникийн үзүүлэлтүүдийн тухайд аэродинамикийн технологийн дэвшил, илүү үр ашигтай хөдөлгүүр, хөнгөн жинтэй тул түлшний хэмнэлттэй.

Нэг суудалд оногдох түлшний зарцуулалт В767-300 агаарын хөлгөөс 20 хувиар бага тул агаарт ялгаруулах нүүрс хүчлийн хийг мөн хэмжээгээр бууруулсан, дэвшилтэт технологи бүхий нисгэгчийн бүхээг, тоноглолуудтай.

В787-9 агаарын хөлгийн цонх нь одоо ашиглаж байгаа бусад агаарын хөлгүүдийн цонхноос цэлгэр том тул зорчигчдод тав тухтай зэрэг олон давуу талтай аж.

"МИАТ" ТӨХК болон AerCap компаниуд 2023 оны тавдугаар сард хоёр ширхэг 787-9 /Dreamliner/ төрлийн агаарын хөлгийг үйл ажиллагааны урт хугацааны түрээсээр авах гэрээг байгуулж, өнгөрсөн онд эхний онгоцоо хүлээж авсан билээ.

Эх сурвалж: "Хөшигийн хөндийн нисэх онгоцны буудал" ТӨХХК