Цагдаагийн байгууллагаас “Ачит ихт” ХХК-тай холбоотой хэргийн мөрдөн шалгах ажиллагааны явцын талаар мэдээлж байна.

ЦЕГ-ын хэвлэл мэдээлэл олон нийттэй харилцаж газрын дарга Дэд хурандаа Г.Пүрэвдэлгэр “Эрдэнэт үйлдвэр ТӨҮК нь “Ачит ихт” компанитай балансын бус хүдэр ашигласны төлбөрт тус компанийн 34 хувийг эзэмшиг гэрээг анх 2013 оны долдугаар сарын 17-ы өдөр байгуулсан байдаг. Ингээд 2015 оны зургаадугаар сарын 25-ы өдөр дээрх гэрээнд өөрчлөлт орж, “Ачит ихт” компани хүдэр ашигласны төлбөрт Эрдэнэт үйлдвэрт эзэмшүүлэхээр тохирсон 34 хувиа буцаан авч, өөрсдөө 100 хувь эзэмших болсон байдаг.  “Ачит ихт” гэх компани нь 2009 онд үүсгэн байгуулагдсан. Тус компанийн хувьцаа эзэмшигчдийн мэдээллийг шалгахад 2010 онд үүсгэн байгуулагдсан "Степкупер" ХХК,  "Цаглавар" ХХК гэж хоёр компани байдаг.

"Степкупер" ХХК нь дөрвөн хувьцаа эзэмшигчидтэй. Тус компанийн 24.5 хувийн хувьцааг иргэн Д. Эрдэнцэцэг гэж хүн эзэмшдэг. 25.5 хувийг нь түүний нөхөр П.Цагаан гэж хүн эзэмшдэг. 25.5 хувийг нь тэдний хүүхэд болох Ц.Номундарь, 24.5 хувийг мөн тэдний хүү болох Ц.Мөнхтүвшин нар эзэмшдэг. Харин "Ачит ихт" ХХК-ийн 22 хувийг "Цаглавар" ХХК эзэмшдэг. Тус компани нь 2016 онд үүсгэн байгуулагдсан. Гүйцэтгэх захирлаар нь МУ-ын иргэн У.Өлзийсайхан ажилладаг. Энэ компанийн эзэмшлийг шалгаж үзэхэд  100 хувь "Степкупер" ХХК -ийн Д.Эрдэнэцэцэг эзэмшдэг нь улсын бүртгэлийн мэдээлэлд байна. Түүнчлэн "Цаглавар" ХХК-ийн гүйцэтгэх захирлаар ажилладаг У.Өлзийжаргал нь "Степкупер" ХХК –ийн ерөнхий нягтлан бодогчоор ажилладаг. Мөн "Ачит ихт" ХХК-ийг 100 хувь П.Цагаан болон түүний эхнэр гэр бүлийн гишүүд эзэмшдэг" гэлээ.