2024 оны дөрөвдүгээр сарын 1-ний байдлаар монгол орны нийт нутгийн 70% цасан бүрхүүлгүй болжээ.

Энэ талаар УОК-оос "Өмнөх 10 хоногоос цасан бүрхүүлийн хэмжээ 16%-аар буурч, нийт нутгийн 30% буюу цас нь хайлаагүй нутгуудын цасны дундаж зузаан 7см.

Цаг уурын байгууллагаас өгсөн мэдээллээр цасан бүрхүүлийн хэмжээ буурч, газар нутгийн 10 орчим хувьд зудын эрсдэлтэй байна. Бусад нутгаар зудын эрсдэлгүй болсон байна. Зудын эрсдэлийн үнэлгээг маргааш танилцуулна.

Энэ жил цас их орсноос цасан бүрхүүлтэй байгаа газар нутгуудад цасан дахь усны нөөц хэмжээ 4.30 шоо/км байна. Тухайлбал:

• Увс, Тэс, Булган, Идэр, Шишгэд, Хараа, Хэрлэн, Ерөө, Халх голын сав газруудын 75-95% цастай байгаа бөгөөд цасан дахь усны нөөц нь дунджаар 0.42 шоо/км.
• Хар нуур, Ховд, Дэлгэрмөрөн, Туул, Чулуут голын сав газрын 40-50% цастай, цасан дахь усны нөөц 0.13 шоо/км.

Эдгээр голуудын сав газраар шар усны үер буух нөхцөл бүрдсэн тул сэрэмжтэй байхыг зөвлөе" хэмээн мэдээллээ.

2024 он гарсаар Онцгой байдлын байгууллагад Улаанбаатар хотын есөн дүүрэг, есөн аймгийн 13 суманд голын усны халианд автсан дөрөв, гүний болон хөрсний шар усанд автсан 81 дуудлага бүртгэгдсэн байна.

Тодруулбал үерийн усанд хоёр орон сууцны В1 давхар, төрийн байгууллагын зоорийн давхар, хоёр нүхэн гарц, нэг ААН-ийн тариалангийн талбай, 18 байшин, 41 гэр, 48 хашаа, таван саравч, төмөр замын нэг , авто замын зорчих хэсэг, гүүрэн дөрвөн байгууламж, цэвэр усны нэг, цахилгааны хоёр байгууламж автжээ.

Өчигдөр буюу дөрөвдүгээр сарын 1-нд нийслэлд шар усны үерт автсан 14, орон нутагт хоёр дуудлага мэдээллийн дагуу үүрэг гүйцэтгэсэн байна.