Монголын анхны мэргэжлийн дугуйчин С.Жамбалжамц өнгөрсөн онд Испанийн "Бурхос Би Эйч" багтай гэрээ байгуулсан билээ. 

Тэгвэл өнгөрсөн долоо хоногийн турш манай дугуйчин "Вольта Каталуния" тэмцээнд хурд сорилоо. С.Жамбалжамц нийт 1,173.4 км замыг 30:18:53 цагт замаа дуусгаснаар 132-д жагслаа. 

Тэрбээр уулын замд сайн уралдаж 26-д бичигдсэнээр багтаа зургаан оноо авчирсан юм. Нийт 25 баг оролцсон тус уралдаанд "Бурхос Би Эйч" баг нь 19-д бичигдэв.

Долоо хоногийн турш үргэлжилсэн тус уралдаанд Словенийн алдарт дугуйчин, Тур Де Франсын хошой аварга, сүүлийн гурван жил дараалан дэлхийн чансааг өнгөлж буй Тадей Погачар итгэл төгс түрүүллээ. 

Т.Погачар 28:21:29 цагт барианд орсноор бүх тамирчдыг тэргүүлээд зогсохгүй нийт оноогоор манлайлж, уулын замын шилдэг дугуйчнаар тодорсон юм. Тэрбээр нийт долоон гарааны дөрөвт нь түрүүлсэн аж. 

Түүний араас Испанийн Микель Ланда Маена +3:41 минутаар хоцорсон бол Колумбын Еган Бернал +5:03 минутаар гуравдугаар байранд оржээ.