Өвөрхангай аймгийн нийт нутгаар цасан шуурга шуурга шуурч, ихэнх сумын нутагт цаг агаарын байдал аюулт үзэгдлийн хэмжээнд хүрээд байгаа аж.

Тодруулбал тус аймгийн Хужирт, Бат-Өлзий, Зүүнбаян-Улаан, Есөнзүйл, Өлзийт, Бүрд, Тарагт сумын нутгаар цаг агаарын байдал аюулт үзэгдлийн хэмжээнд хүрч, салхины хурд 12-16 м/c, зарим үед 20-24 м/с хүртэл ширүүснэ. Нутгийн өмнөд хэсгээр буюу Баруунбаян-Улаан, Төгрөг, Гучин-Ус, Богд сумын нутгаар цасан болон шороон шуурга шуурна.

Иймд цаг агаарын ноцтой байдлын энэ үеэр болзошгүй аюулт үзэгдлээс урьдчилан сэргийлэх арга хэмжээг авахыг Нийгмийн Эрүүл Мэндийн Үндэсний Төв(НЭМҮТ)-өөс зөвлөснийг хүргэе.

Хүчтэй цасан шуурганд төөрч, осгож хөлдөхөөс сэргийлж, өөрийн болон бусдын аюулгүй байдлыг хамгаалахдаа:

• Онцгой шаардлагагүй бол гэрээсээ гарахгүй байх
• Бага насны хүүхдийг ганцааранг нь орхихгүй байх
• Холын аян замд гарахгүй байх
• Шороо, тоосноос сэргийлж амны хаалт зүүх
• Халуун бүлээн зүйл тогтмол уух
• Цонх, салхивчаа хаах
• Цахилгаан хэрэгслээ бүрэн унтраах
• Цасан шуурганд төөрөх, малтайгаа уруудах эрсдэлээс сэргийлэх
• Мал сүргээ нөмөр нөөлөг ойр газарт бэлчээх
• Малын өвс тэжээлийн нөөцтэй бэлэн байдалд байх
• Бага насны хүүхэд, ахмад настай, жирэмсэн эхчүүдийг малд явуулахгүй байх.

Зайлшгүй тохиолдолтоор орон нутгийн замд зорчихдоо:

• Техникийн бүрэн бүтэн байдлыг шалгах
• Хамгаалалтын бүсийг хэрэглэж, хэвших
• Мэргэшсэн жолоочгүйгээр замын хөдөлгөөнд оролцохгүй байх
• Хол замд тээврийн хэрэгсэлтэй зөрөхдөө гэрлээ шилжүүлэх
• Хэт ядарсан үедээ удаан хугацаагаар тээврийн хэрэгсэл жолоодохгүй байх
• Замын хөдөлгөөнд оролцохдоо гар утсаа ашиглахгүй байх
• Согтууруулах ундаанаас татгалзах
• Яаралтай үед хэрэглэх хэрэгслийг бэлэн байлгах (хоол хүнс, гар чийдэн, хүрз, зөөврийн цэнэглэгч гэх мэт).