Жил бүрийн хаврын улиралд Завхан аймгийн Улиастай сумын Богдын гол багийн голын ай сав дагуу буусан айл өрхүүд шар усны үерт автах эрсдэл үүсдэг. Энэ хавар ч мөн огцом дулаарах, гэнэт хүйтрэх зэрэг цаг агаарын шинж байдлаас шалтгаалан голын халиа дошин ихээр үүсэж байна.

Тус аймгийн Засаг дарга Г.Өнөрбаяр өчигдөр /2024.02.21/ нөхцөл байдалтай биечлэн танилцаж, холбогдох албаны хүмүүстэй хамтарсан үзлэг хийлээ. Бүрэлдэхүүнд аймгийн ОБГ, Цагдаагийн газар, Улиастай сумын захирагчийн алба, Хот тохижилт үйлчилгээний албаны удирдлагууд оролцов.

Тодруулбал Богдын гол багийн энэ хэсэгт 160 гаруй айл өрх эрсдэлт нөхцөлд байгаа бөгөөд эдгээр айлууд нь голын ай саваас 500 метрээс хол зайд байх ёстой. Гэвч зөвшөөрөлтэй зөвшөөрөлгүйгээр ийнхүү голын сав дагуу 2-3 метрийн зайд суурьшин амьдарч байна.

Аймгийн Засаг дарга Г.Өнөрбаяр эхний ээлжинд голын мөсийг хагалан суваг татаж, мөсөн хашлага хийх арга хэмжээг маргаашнаас эхлэх, холбогдох зардлыг аймгийн Засаг даргын нөөц сангаас гаргахаар шийдвэрлэв.

Богдын голын үерийн далангийн 2,3 тэрбум төгрөгийн өртөгтэй 1493 метр газрын далан барих зураг төсөв хийгдээд байна.