Ерөнхий боловсролын сургуульд багшлах эрхийн гэрчилгээ олгох 45 хоногийн сургалтын агуулга, тавигдах шаардлагыг албан ёсоор танилцууллаа. Уг сургалтын дөрөвдүгээр ээлжийн элсэлт эхэлсэн бөгөөд багш мэргэжлээр ажиллах хүсэлтэй иргэдийг хамруулж байна. Сургалтад хамрагдагсад хүүхдийн хөгжил, хамгаалал, сурган хүмүүжүүлэх сэтгэл судлал, багшлахуй ба суралцахуйн онол, арга зүй, багшийн хөгжил, мэргэжлийн ёс зүй зэрэг үндсэн агуулгаар суралцах юм.

Элсэгчдэд

1. Математик болон байгалийн шинжлэх ухаан, анагаах ухаан, мэдээлэл харилцаа, технологи, хууль, бизнес, эдийн засаг, урлаг, англи хэлний чиглэлээр дээд боловсролын сургалтын байгууллагыг 2.7-оос доошгүй голч дүнтэй төгссөн, бакалавраас доошгүй зэрэгтэй байх;
2. Эрүүгийн хуульд заасан авлига, албан тушаалын болон бусад гэмт хэрэг үйлдэж шүүхээр ял шийтгүүлж байгаагүй байх;
3. Монгол хэлний ярианы болон бичгийн чадвартай байх;
4. Сэтгэцийн өвчин, эмгэггүй байх зэрэг шаардлага тавьсан нь анхаарал татаж байна. Боловсролын байгууллагад ажиллах багшийн ёс зүй, хүүхэдтэй шууд харьцан ажиллах онцлогтой холбоотойгоор багшлах мэргэжлийн шалгуурыг чангатгаж буй бодлогын хүрээнд энэхүү шаардлагыг тусгасан гэж үзэж байна.