Жил бүр хөлдөлт, осголтоор цөөнгүй иргэд амь насаа алддаг бөгөөд ихэнх нь баяр ёслолын өдрүүд үргэлжилдэг шинэ жилийн үеэр санамсар болгоомжгүй байдлаасаа болж амиа алддаг байна. Зөвхөн 12 дугаар сар гараад 20 гаруй хүн ил харагдах шархгүй, золгүй байдлаар амиа алдсан гэх мэдээлэл байна. Тэдний олонх нь шинэ жилийн баяраа тэмдэглэж яваад, согтож, осгосон байдалтай олдсоныг цагдаагийн байгууллагаас сэрэмжлүүлж, өмнө жилүүдэд баярын үеэр тохиолдсон золгүй явдлуудыг сэрэмжлүүлэх зорилгоор хүргэж байна. 

• Дорноговь аймгийн Сайншанд хотод 52 настай Б согтуугаар гудамжинд унтаж байгаад осгож амиа алджээ. Талийгаач тус аймгийн бизнесменүүдийн шинэ жилийн баярын цэнгүүнд оролцож согтууруулах ундаа хэтрүүлэн хэрэглэснээр ийнхүү амиа алджээ. Хэргийн газарт очсон цагдаа нар болоод эх сурвалж мэдээлэхдээ Б нь машиныхаа хажууд унаад босч чадалгүй байсаар осгож амиа алдсан гэнэ.
• Орхон аймгийн Баян-Өндөр суманд 34 настай эмэгтэй гудамжинд осгож нас барсан байсан бөгөөд өндөр өсгийтэй туфль, гоёлын даашинз, шилэн трико, гадуураа өвлийн куртка өмссөн байжээ. Тэрбээр Эрдэнэт хотын “Жаргалантын гол” хэмээх ХХК-д менежерийн албан тушаал эрхэлдэг байжээ.
• Баянзүрх дүүргийн 17 дугаар хороонд 31 настай эрэгтэй байрныхаа орц руу орж чадалгүй осгож амиа алдсан байсан бөгөөд мөн л дан өмд, пиджактай хэт нимгэн хувцасласан байна. Хэргийн газарт очсон цагдаа нар талийгаачийн хажуухнаас оны шилдэг ажилтны өргөмжлөл олсон байна. Уг нь ажлынхан нь таксинд суулгасан ч гэрээсээ хэдхэн алхмын наана нас барсан байж.

Энэ мэтчилэн алтан амиа үнэгүйдүүлж шинэ жил нэрийн дор согтууруулах ундаа хэтрүүлснээс үүдэн осгож нас бардаг тул цагдаагийн байгууллагаас анхааруулж байна.