Анхдугаар Богдын нутгаас анхны лхаарамба цолтон төрлөө.

Тодруулбал, Өвөрхангай аймгийн Ганданпунцоглин хийд /Gandanpuntsoglin khiid/-Арвайн хүрээний шавь, Уянга сумын уугуул, Нямдоржийн Аз лам нь Энэтхэг улсын Балданбрайвүн хийдэд Буддын гүн ухааны чиглэлээр 22 жил шамдан суралцсан. Тэрбээр хуврагийн ёсны сахил санваарыг чандлан сахиж “Лхаарамба” хэмээх эрхэм дээд эрдмийн цолыг хүртэж дамжаагаа амжилттай хамгаалан Арвайн хүрээндээ морилжээ. 

Энэтхэгийн Гэлүгбийн найман сургуульд Буддын гүн ухааны таван ботийг 16 жилийн хөтөлбөртэйгээр суралцаж Лхаарамбын шалгалтад орох эрх авдаг.  Үүний дараа жилд нэг удаа буюу нийт зургаан удаа буддын гүн ухаанаар шалгалт өгч тэнцсэнээр Лхаарамба цол хүртдэг байна.  Нямдоржийн Аз нь манай улсаас Лхаарамба эрдмийн цолыг хүртсэн 57 дахь лам юм.