Өвөрмонголын Хөххот хот дахь “Maple Leaf” олон улсын дунд сургуулийн багш С нь тус сургуулийн долдугаар ангийн монгол сурагчдыг зодсон гэх мэдээлэл олон нийтийн анхаарлыг татаж байна.

Нэгэн иргэн цахим хуудсаар дамжуулан багш С сурагчдын хоолойг боомилж, өшиглөж, самбарт мөргүүлэн зодсон тухай мэдээлсэн байна. Тэрбээр “БНХАУ-ын хуулиар хүүхдийг шийтгэх зорилгоор зодохыг хориглодог. Болсон үйл явдлын бичлэгийг ил болгох шаардлагатай” хэмээн онцолжээ.

Сургуулийн удирдлага уг багшийг ажлаас халсан ч хэрэг хуулийн байгууллагад шалгагдаж эхлээгүй, хүүхдүүдийг эмнэлгийн үзлэгт хамруулаагүй нь эцэг, эхчүүдийн гомдлыг улам нэмэгдүүлжээ. Үүний улмаас эцэг, эхчүүд Хөххот дахь Монгол Улсын Консулын Газарт хандсан бөгөөд яаралтай арга хэмжээ авахыг шаардсан байна.