Өнгөрсөн 10 дугаар сарын 15-ны өдөр Баянбүрдийн тойргийн хөшөөний доор орон гэргүй, согтуу этгээд гал түлсний улмаас голд “Чингэлтэй дүүрэг” гэсэн бичиглэл бүхий хөшөө шатсан. Тэгвэл уг хөшөө байсан газрыг дөрвөн замын уулзвар болгохоор болжээ.

Баянбүрдийн тойрогт байрлах Чингэлтэй дүүргийн баганат хөшөөг 1997 оны есдүгээр сарын 17-ны өдөр албан ёсоор нээж байжээ. Энэ өндөрлөгийг газрын гүнээс урган бадарсан мөнгөн багана, түүний оройд Монгол төрийн сүлдийг дээдлэн залж, дүүргийн бэлгэдэл тэмдгийг алтан шаргал өнгөөр урлан бүтээсэн байна.

Хөшөө шатсан тул нийслэл болон дүүргийн удирдлагууд уг байршлыг шинэчилж, дөрвөн замын уулзвар болгохоор төлөвлөөд байна. Энэ дагуу зураг төслийн ажлын тендер зарлагдсан бөгөөд нийт 318 сая төгрөгийн төсөв батлагджээ. Тодруулбал, арванхоёрдугаар сарын 3-нд Нийслэлийн худалдан авах ажиллагааны газар “Баянбүрдийн тойрог уулзварын зураг төсөл” нэртэй тендерийг зарлаж, үнийн санал хүлээн авч эхэлсэн байна.