Түлш хэрэглэгчдэд үйлчлэх төвөөс зуух нь битүүмжээ алдаж, угаартах эрсдэл өндөр болсон зорилтот бүлгийн айлуудад шинэ зуух суурилуулж байна. Тус асуудлаар нийслэлийн Засаг даргын нийгмийн салбар, ногоон хөгжил болон агаар, орчны бохирдлын асуудал хариуцсан орлогч А.Амартүвшин Сонгинохайрхан дүүргийн 8 дугаар хороонд ажиллав. Энэ үеэр нийслэлийн Засаг даргын нийгмийн салбар, ногоон хөгжил болон агаар, орчны бохирдлын асуудал хариуцсан орлогч А.Амартүвшин “СХД-ийн 8 дугаар хороонд олон хүүхэдтэй, хөгжлийн бэрхшээлтэй, өндөр настай, өрх толгойлсон зорилтот бүлгийн айл өрх олон байна. Эдгээр айлын хэрэглэж буй хуучин зуухнууд ан цав гарч, битүүмжээ алдан угаартах өндөр эрсдэлтэй болсон тул нийслэлээс зуух шинэчлэх ажлыг үе шаттай хийж байна. Сольж буй шинэ зуух нь бүтэн шаталттай тул утаа бага гаргана. Түлшний цэгүүдийн үйл ажиллагаа жигдэрсэн. Өнөөдрийн байдлаар 425 түлшний цэг ажиллаж, 410 цэг түлшний илүүдэлтэй хонож байна. Иргэдийн санал гомдлын дагуу түлшний цэгүүдийн тоог нэмсэн” гэв.

СХД-ийн 8 дугаар хорооны иргэн Ц.Сэлэнгэмөрөн “Манайх таван хүүхэдтэй. Хуучин зуухны битүүмж алдаад утаа их гардаг байсан. Иймд угаартах эрсдэлээс сэргийлж Түлш хэрэглэгчдэд үйлчлэх төв рүү зуух солиулах хүсэлт гаргасан. Хүсэлт өгснөөс хойш гурав хоногийн дотор шинэ зуух суурилуулж өгсөнд тун баяртай байна.Мөн түлшний цэгээс долоо хоногийн түлшээ хэвийн авч байна” гэв. Энэ үеэр НЗД-ийн орлогч А.Амартүвшин тус айлд угаар мэдрэгчийг тогтмол асаалттай байлгах, зуухаа зөв горимоор галлах, цахилгааны утасны аюулгүй ажиллагааг хангах зэрэг зөвлөмж өглөө.

Эх сурвалж: НЗДТГ