Шүүгдэгч Б нь 2023 оны 08 дугаар сарын 19-нөөс 20-нд шилжих шөнө Дундговь аймгийн Сайхан-Овоо сумын нутаг дэвсгэрт Тоёота Альфард маркийн тээврийн хэрэгслийг жолоодож явахдаа Монгол Улсын Замын хөдөлгөөний дүрмийн 12.3 дахь хэсэгт заасан “Жолооч хөдөлгөөнд аюул саад тулгарахыг мэдсэн үед тээврийн хэрэгслийн хурдыг хасаж, зайлшгүй тохиолдолд зогсоох арга хэмжээ авна”, мөн дүрмийн 12.2 дахь хэсэгт заасан “Жолооч өөрийн үзэгдэх хүрээн дотор тээврийн хэрэгслээ зогсоох боломжтой хурдыг сонгож явна” гэх заалтуудыг зөрчиж онхолдон улмаар зорчигч М-ийн амь насыг хохироосон гэмт хэрэгт холбогджээ.
Анхан шатны шүүхээс шүүгдэгчийн тээврийн хэрэгсэл жолоодох эрхийг 3 жилийн хугацаагаар хасаж, 3 жил зорчих эрхийг хязгаарлах ял оногдуулж шийтгэж, шүүгдэгчээс оршуулгын зардалд 13,7 сая төгрөг, сэтгэцэд учирсан хор уршигт 114,5 сая төгрөгийг тус тус гаргуулж хохирогчийн хууль ёсны төлөөлөгчид олгох болон  амь хохирогчийн асрамжид байсан бага насны гурван хүүхдэд сар бүр 220 мянган төгрөгийг арван зургаан нас хүртэл, суралцах бол арван найман нас хүртэл гаргуулах шийдвэр гаргасан байдаг.  Харин давж заалдах шатны шүүхээс анхан шатны шүүхийн зарим хэсэгт өөрчлөлт оруулж шийдвэрлэсэн.
Улсын дээд шүүхийн Эрүүгийн хэргийн танхимын 2025 оны 11 дүгээр сарын 27-ны өдрийн шүүх хуралдаанаар тус хэргийг хянан хэлэлцүүлээд гэм буруугийн талаар анхан болон давж заалдах шатны шүүхийн  шийдвэр магадлал, хууль зүйн үндэслэлтэй, эрүүгийн хуулийг зөв хэрэглэсэн харин гэмт хэргийн улмаас учирсан гэм хорын хохирлын асуудал дээр хийсэн зөрүүтэй дүгнэлтүүд буюу оршуулгын зардлын үлдэх хэсэг 13 сая, тэжээгчээ алдсаны тэтгэвэр 663,3 мянган төгрөг, гэмт хэргийн улмаас сэтгэцэд учирсан хохиролд 82,5 сая төгрөгийг тус тус шүүгдэгчээс гаргуулж хохирогчийн хууль ёсны төлөөлөгчид олгохоор шийдвэрлэв.