Хүйтний улирал ирсэнтэй холбоотойгоор иргэд томуу, томуу төст өвчний хөнгөн болон хүнд хэлбэрт өртөж байна. Гэсэн хэдий ч Монгол Улсын хэмжээнд 10 мянган хүн амд 41.6 тохиолдол бүртгэгдэж, сүүлийн гурван жилийн дунджаас өвчлөл 6.8–33.7 хувиар бага байгааг Эрүүл мэндийн яам мэдээллээ.

Эхний арван сарын байдлаар амбулаторийн тусламж авсан 281,624 хүнээс 5.1 хувь буюу 14,308 нь томуу, томуу төст өвчтэй байжээ. Үүнээс 34.4 хувь нь нийслэлд, 65.6 хувь нь орон нутагт бүртгэгдсэн байна. Эмнэлэгт хэвтэн эмчлүүлж буй 7,084 хүний 18.9 хувь буюу 1,342 нь амьсгалын замын цочмог хүнд халдварын шалтгаантай бөгөөд Улаанбаатарт 44.3 хувь, орон нутагт 55.7 хувь нь бүртгэгджээ.

Томуу, томуу төст өвчнөөр өвчлөгсдийн 79.2 хувийг 15 хүртэлх насныхан, 51.8 хувийг тав хүртэлх насны хүүхэд эзэлж байна. Эмнэлэгт хэвтэгсдийн 80.6 хувь нь 15 хүртэлх насныхан, үүнээс 65.1 хувь нь тав хүртэлх насны хүүхдүүд байна.

ХӨСҮТ-д хийсэн вирусийн шинжилгээгээр зонхилсон вирусүүд нь: A/H3N2, АЗСВ, риновирус, бокавирус, ижтомуугийн вирус гэсэн дүн гарчээ. Эдгээр вирусийн халдвар өндөр халууралт үүсгэж, хоруу чанар өндөртэй тул 0–6 насны хүүхэд, жирэмсэн ээжүүд, ахмад настай болон архаг хууч өвчтэй хүмүүс эрүүл мэнддээ онцгой анхаарах шаардлагатай гэж мэргэжилтнүүд зөвлөж байна.