Монголын Эрүүл мэндийн ажилтны үйлдвэрчний эвлэлийн төлөөлөл өчигдөр /2025.11.12/ Эрүүл мэндийн сайд Ж.Чинбүрэн, Сангийн сайд Б.Жавхлан, Гэр бүл, хөдөлмөр,нийгмийн хамгааллын сайд Т.Аубакир нартай уулзсан. Энэ тухай салбарын үйлдвэрчний эвлэлийн холбооны дарга Ч.Нарантуяа мэдээлэл өгөхдөө "Эрүүл мэндийн салбарын эмч ажилчид суулт хийж, Сүхбаатарын талбайд хонолоо. Жагсаал цуглаан хийлээ. Энэ бүхэнд аймаг сумдын эрүүл мэндийн байгууллага нэгдэж, үндэсний хэмжээнд энэхүү тэмцэл хөдөлгөөнийг дэмжсэн. Үйлдвэрчний эвлэл хамгийн хүчтэй гэдгийг харуулсан түүхэн үйл явдал боллоо.

Бид сая Эрүүл мэндийн сайд Ж.Чинбүрэн, Сангийн сайд Б.Жавхлан, Гэр бүл, хөдөлмөр,нийгмийн хамгааллын сайд Т.Аубакир нартай уулзлаа. Үндсэн гол асуудал бол эмч ажилчдын үндсэн цалинг 3.5 сая төгрөгт хүргэх. Ер нь салбарын ажилчдын цалин хөлсийг нэмэгдүүлэхээр 2026 оны улсын төсөвт огт тусгаагүй байсан.

Бидний тэмцлийн үр дүнд эхлээд 15 хувь, дараа нь 30 хувь нэмэх асуудлыг ярьсан. Эрүүл мэндийн салбарын ажилчдын үндсэн цалинг 2026 онд 75 хувиар нэмэх урьдчилсан хэлэлцээг хийх горимын санал дээр байр суурь нэгдлээ. Тиймээс 2025 оны арваннэгдүгээр сарын 13-ны өдрийн 08.00 цагаас улс орон даяар ажил хаялт эхлэх байсныг нэг хоногоор хойшлуулж байна. Салбарын нэмэлт хэлэлцээрийг байгуулах хэлэлцээг эхлүүлэхээр болсон. Хэрвээ гурван тал хэлэлцээр хийхээр тохиролцож чадвал Гэр бүл, хөдөлмөр, нийгмийн хамгааллын яамаараа бүртгэлжүүлж, албажуулсны дараагаар хугацаагүй ажил хаялтаа бүрэн зогсооно. Энэ хугацаанд эмнэлгүүд хэвийн горимоор ажиллана" гэсэн юм.

Монголын Эрүүл мэндийн ажилтны уг жагсаалд одоогоор улс орон даяар 100 гаруй эрүүл мэндийн байгууллагын эмч, ажилтнууд ажил хаялт зарлана гэдгээ мэдэгдээд байгаа билээ.