Явган хүний зам, автобусны буудал дээр автозамын нэгдүгээр эгнээг хааж зогссон, автомашинаа зогсоолд бусдын хөдөлгөөнд саад болохоор байрлуулсан зөрчлийг иргэд зургаар баталгаажуулан, 102 аппликэйшнээр Замын хөдөлгөөний удирдлагын төвд  илгээвэл урамшуулал олгох зохицуулалт энэ сарын 01-нээс үйлчилж эхэлсэн.

Тээврийн цагдаагийн албанаас мэдээлснээр замын хөдөлгөөний зөрчлийг мэдээлсэн иргэнд зөрчилд ногдуулсан торгуулийн 10–20 хувийг урамшуулал хэлбэрээр олгоно. Ингэхдээ НӨАТ-ын буцаан олголтын хугацаатай ижил буюу жилд дөрвөн удаа улирлаар нь олгоно. 2025 оны 11,12 дугаар сарын урамшууллыг 2026 оны нэгдүгээр сарын 20-нд олгохоор тогтжээ. 

Урамшууллын дүнгээс орлогын албан татвар суутгаж, иргэний данс руу шилжүүлэх юм. 20,000 төгрөгийн торгууль ногдуулсан бол зөрчил мэдээлсэн иргэн 10–20 хувийн буюу 2,000–4,000 төгрөгийн урамшуулал авах боломжтой. Хэрэв зөрчил гаргасан жолооч торгуулиа хугацаандаа төлөөгүйгээс үнийн дүн өссөн бол урамшуулал өссөн дүнгээс тооцогдоно.

Журам хэрэгжиж эхэлснээс хойш өдөрт 6000-7000 зөрчлийг зургаар баталгаажуулан илгээж байгаа ажээ.