“Ноорог”-ийн О.Уламсайхан өнгөрсөн шөнө бусдын халдлагад өртөж, биеийн байдал нь хүнд байгаа талаар эх сурвалж мэдээлсэн. Тэгвэл уг мэдээлэл гарсны дараагаар “Огцрох амархан” жагсаал зохион байгуулагчдын нэг, Сэтгүүл зүйн Инновац, Хөгжлийн Үүр төвд Төсөл, хөтөлбөрийн менежер Ж.Өнөмөнх цахим хуудсаараа дараах мэдээллийг олон нийтэд өглөө.

Тэрбээр, “Ноорог.мн сайтын гүйцэтгэх захирал О.Уламсайхан бусдад хутгалуулж, хүнд гэмтсэн нь үнэн. Тэрээр яг одоо хагалгаанд орж байна. Уг асуудлыг хэл аманд оруулахгүй, ар гэрийнхэнд нь хүндрэл учруулахгүй гэсэндээ гадагш мэдээлэл өгөөд яах вэ гэж байсан ч аль хэдий нь сайтууд дээр мэдээлэл нь түгсэн байна.

Энэ үед О.Уламсайханы биед халдсан гэмт хэргийг хэт дэлгэрэнгүй мэдээлэх, олон нийтийн сүлжээн дэх постуудын дор бичсэн зохион байгуулалттай сөрөг сэтгэгдэл зэрэг нь сэтгэл санааны байдал нь тун хүнд байгаа ар гэрийнхэнд нь давхар дарамт болж байна. Иймд та бүхнийг элдэв таамаг, баталгаагүй мэдээлэл түгээхгүй байхыг уриалъя.

Ялангуяа түүний ар гэр, өмгөөлөгч баталсан тохиолдолд, болсон үйл явдлыг хэт сенсацжуулахгүйгээр мэдээлж, шаардлагатай тохиолдолд үзэн ядалтын үг хэллэг агуулсан сэтгэгдэл хэсгийг хааж өгнө үү хэмээн хүсэж байна.

Ар гэрийнхэнтэй нь ярилцаж зөвшөөрөл авч ийнхүү пост бичсэн болно. Хэвлэл мэдээллийн байгууллагууд мэдээлэл авах бол хөндлөнгийн эх сурвалжуудтай шууд холбогдолгүй нааш холбогдоно уу” гэлээ.