“Нойр судлалын асуудал” олон улсын анхдугаар хурал  2025 оны 11-р сарын 6-7-ны өдрүүдэд амжилттай зохион байгуулагдлаа. Хурлын нээлтэд АШУҮИС-ийн ректор, АУ-ны профессор Б.Дамдиндорж тэргүүтэй АШУҮИС, АУС, МЯЭ-ийн удирдлагууд уригдан, мэндчилгээ дэвшүүллээ.   Хуралд Япон улсын Окинава, Накамура нойрны төвийн профессор Хироши Накамура, Эхимэ их сургуулийн нойрны төвийн эрхлэгч, профессор Ясунори Ока, Токиогийн Анагаах Ухааны их сургуулийн нойрны төвийн профессор Юүичи Иноүэ нарын хүндтэй эрдэмтэд уригдан оролцож “Нойрны Анагаах ухааны түүх, орчин үеийн чиг хандлага; Япон улсад нойр судлалыг хөгжүүлсэн замнал, туршлага; нойрны эмгэгийн оношилгоо, эмчилгээний зарчим; Монгол улсад нойр судлалыг хөгжүүлэх асуудал” зэрэг сэдвийн хүрээнд сонирхолтой лекц уншиж, хэлэлцүүлэг өрнүүлсэн бол АУС-ийн Мэдрэл судлалын тэнхим, МЯЭ-ийн Мэдрэл-мэдрэлийн мэс заслын тасаг, эпилепсийн төв, нойрны төвийн эрдэмтэн багш, эмч нар, Монголын нойр судлалын нийгэмлэгийн эмч, мэргэжилтнүүд “МЯЭ-ийн Нойрны төвийн танилцуулгаас гадна нойрны физиологи, эпилепси, паркинсон болон тархины харвалтын үеийн нойрны өөрчлөлт сэдвээр лекц уншиж, нойрны эмгэгийн судалгааны үр дүн, эмнэлзүйн тохиолдол танилцуулга хийлээ.

Нойр судлалын анхдугаар хуралд Улаанбаатар хот, орон нутгийн мэдрэл, сэтгэц, хүүхдийн мэдрэл, уушиг, чих хамар хоолой, сэргээн засах зэрэг салбарын эмч, мэргэжилтэн, резидент эмч, оюутнууд өргөнөөр оролцлоо. Хурлын үеэр АШУҮИС-ийн МЯЭ болон Япон улсын Эхимэ их сургуулийн нойрны төв хооронд хамтын ажиллагааны гэрээ байгуулж, Монгол-Японы эмнэлгийн захирал, АУ-ны доктор Т.Баясгалан, Эхимэ их сургуулийн нойрны төвийн эрхлэгч, Профессор Ясунори Ока нар гэрээг үзэглэлээ.