Өдөрт 150 тонн ангилан ялгасан хог хаягдал хүлээн авч, цагт 10-15 тонныг прэсслэх хүчин чадалтай Эко Хаб төв нээлтээ хийлээ.

Монгол Улсад 3,811.6 га бүхий 396 хог хаях цэг байх ба жилд дунджаар 3.4 сая тонн хог хаягдал өрх, байгууллагаас гарч тэнд хүрдэг билээ. Одоогийн байдлаар дээрх хог хаягдлын 7.6 хувийг дахин боловсруулдаг ч 30-40 хувьд хүрэх боломжтой аж. Улаанбаатар хотын нэг дүүрэг өдөрт дунджаар 300–350 тонн хог хаягдал ачуулдаг ба Эко Хаб нь Чингэлтэйн 12-р хороонд байрлах тул Чингэлтэй, Баянгол болон Сүхбаатар дүүргүүдээс ангилсан хог хаягдал татах давуу талтай юм. Алсдаа энэ нь хогийн цэгийн ачааллыг бууруулж, хөрсний бохирдлоос урьдчилан сэргийлэх чухал ач холбогдолтойг төслийн зүгээс хэллээ.

Өрхийн хэмжээнд ангилсан хог хаягдлаа “Эко Хаб” гар утасны аппликейшн ашиглан тушаах бүрдээ урамшууллын оноо цуглуулах, их хэмжээний хог хаягдал ачуулахаар бол тээвэрлэгч дуудах гэх мэт давуу тал олгохоор төлөвлөжээ.

3R4UB төслийн Ерөнхий зохицуулагч Фабрицио Канонико “Европын холбооноос SwitchAsia хөтөлбөрөөр дамжуулан санхүүжүүлсэн 3R4UB төслийн гол үр дүн гэж хэлж болох Эко Хаб төв ийнхүү үйл ажиллагаа эхлүүллээ. Улаанбаатар хотыг тогтвортой хөгжүүлэх зорилго, хараа нэгтэй дахин боловсруулах салбарынхан энэхүү төвд хамтран ажиллаж, харилцан суралцаж, шинэ шинэлэг санал санаачилгуудыг гаргана гэдэгт итгэлтэй байна. Эко Хаб нь зүгээр ч нэг хог хаягдал ангилж нийлүүлээд зогсохгүй тойрог эдийн засаг руу хөрвөх шилжилтэд талуудыг татан оролцуулж сургалт зөвлөгөөн, нөлөөллийн ажлууд зохион байгуулна” хэмээлээ. 

Тус төв нь цэцэрлэг, сургууль, төрийн байгууллага зэрэг хяналттай бүс, байгууллагуудаас ялгасан хог хаягдлыг хүлээн авч дахин боловсруулах боломжтой түүхий эдийг ангилан боловсруулалтын сүлжээнд нийлүүлэх юм.