Монгол улсын хэмжээнд 1-5 дугаар ангийн сурагчдыг үдийн цай хөтөлбөрт хамруулдаг бол Өмнөговь аймаг өөрийн төсвөөсөө улсын төсөв дээр нэмэлт байдлаар шийдвэрлэж үндсэндээ Өмнөговь аймгийн хэмжээнд 1-7 дугаар ангийн сурагчид үдийн хоол хөтөлбөрт хамрагддаг. Харин Ханбогд сумын хувьд Өсөлттэй Ханбогд Засаг даргын үйл ажиллагааны хөтөлбөр болон Ханбогд сумын 2025 оны хөгжлийн жилийн төлөвлөгөөний дагуу сумынхаа ЕБС-ийн 8-12 дугаар ангийн сурагчдыг нэмэлтээр “Үдийн цай” хөтөлбөрт 100 хувь хамруулах /хүүхэд тус бүрт 2270төг/ ажлыг өнөөдрөөс эхлэж байна.

Мөн нэгдүгээр сургуулийн дотуур байрны хүүхдүүдийн дархлааг дэмжих нэмэлт хүнсний бүтээгдэхүүнээр хангах зорилгоор улсын төсвөөр батлагдсан нэгж өртөг дээр нэмэлтээр нэг хүүхдийн 2270 төгрөгийн санхүүжилт шийдвэрлэсэн юм.

Үдийн цай хөтөлбөр нь Монголын боловсролын салбарт сурагчдын ирц, эрүүл мэнд, сургалтын чанар, нийгмийн тэгш байдлыг дэмжсэн бодит үр дүнтэй хөтөлбөр болсон гэж дүгнэгддэг бөгөөд энэхүү хөтөлбөрийг сум орон нутгийн удирдлагын зүгээс бодлогын түвшинд дэмжиж нийт сурагчдыг хамруулснаар энэхүү үр дүнг суманд илүү бодитогойгоор бий болгох боломж нөхцөл бүрдлээ хэмээн Ханбогд сумын ЗДТГ-аас мэдээллээ.