Цахим залилангийн хохирогчид өдрөөс өдөрт нэмэгдсээр байна. Цагдаагийн байгууллага болон хэвлэл мэдээллийн хэрэгслээр тогтмол сэрэмжлүүлэх мэдээ хүргэж байгаа ч өдөрт энэ залилуулах тохиолдол тогтмол олноор үйлдэгдсээр байна. 

Энэ удаад Чойр ТВ-ийн бэлтгэсэн мэдээллээс сэрэмжлүүлэх зорилгоор нийтэллээ. Хохирогч настай эмэгтэй Улаанбаатар хотод байр авах гээд урьдчилгаа цуглуулж байсан. Тэрбээр гайгүй шиг үнэтэй аятайхан байр авахаар судалж байгаагаа ойр дотынхоо хүрээллийн хүмүүст дуулгасан. Тэгэхэд өмнө ажиллаж байсан газрынх нь захирал нэг газрыг санал болгосон. Тухайн санал болгосон хүнтэй хохирогч цахимаар танилцаж, 2-3 сар харилцсны эцэст "Ашиглалтад орж байгаа 500 сая төгрөгийн үнэтэй байрыг өөрт чинь 250 саяар зохицуулж өгье, яг одоо 30 хувийг нь хийчих" гэснээр цуглуулсан мөнгөө шилжүүлжээ. Өөрөөр хэлбэл, бодитоор нүүр тулж уулзаагүй этгээдэд ямар ч гэрээ хийхгүйгээр цахимаар итгэж, мөнгөө шилжүүлжээ.  

Эмэгтэй зөвхөн урьдчилгаагаар хохироогүй, процесс ийм байдлаар үргэлжилж байна гэх мэтээр мөнгө нэмж авсан, улмаар мөнгөө авья гэхээр нь дарамталж сүрдүүлж байжээ.

Идэвхтэй байр хайж байсан ээж нь чимээгүй болчхоор нь хүү нь ихэд гайхсан. Тэгээд нэг удаа санамсаргүйгээр утсыг нь засварт өгч янзлуулахдаа ээжийгээ залилуулсан төдийгүй дарамтад өртөөд үүнийгээ нууж явааг нь мэдэж, цагдаагийн байгууллагад хандсан байна. Хүүгийнх нь ярьснаар залилагч этгээд тухайн эмэгтэй рүү " Монголд шинэ стандартыг хангасан байр" хэмээн эвлүүлсэн зураг, бичлэг явуулдаг байсан. "Мөнгөө авья" гэхээр "Үр хүүхдүүдийг чинь ална, амьдралыг нь сүйрүүлнэ, чаддаг юмбол цагдаагаар яв" гэх мэт сүрдүүлж байжээ.