Дүүргийн эрүү, иргэний хялбар ажиллагааны шүүгчийн шийдвэрийн дагуу гэр бүлийн хүчирхийллийн хэргээр 30 хоног баривчлагдсан НИТХ-ын төлөөлөгя Б.Эрдэнэсүхийг өчигдөр (2025.10.30) сулласан талаарх мэдээлэл гарсан. Энэ талаар сэтгүүлч С.Бүдрагчаа "Хэдхэн хоногийн өмнө хохирогч О.Нарангаравын амь нас эрүүл мэндэд аюул учрах бодит нөхцөл бүрдсэн хэмээн алх цохьж байсан шүүх өчигдөр гэнэт зангаа хувиргасанд хохирогчийн ар гэрийнхэн гомдолтой байгаагаа надад хэлж байна. О.Нарангарав болон түүний гэр бүлийнхэнд биечилсэн хамгаалалт авах нь битгий хэл түр хамгаалах байранд ч аваагүй учраас тэд маш их айдастай, гэрээсээ гарч чадахгүй байх нөхцөл бүрдчихлээ гэдгээ хэлж байна. Б.Эрдэнэсүх гэдэг ганцхан хүн эрх чөлөөтэй болохтой зэрэг түүний эрхшээлд олон жил зовсон 5 хүн эрх чөлөөгүй, байнгын айдастай болж хувирчээ. Хохирогч О.Нарангаравт Жендерийн үндэсний хорооноос өмгөөлөгч гарган өгч тусалсны дараа тэрбээр дараах дөрвөн үндэслэлээр эрх нь зөрчигдсөн болохыг анх мэджээ. 

1. Гэр бүлийн хүчирхийлэлд байнга өртсөн

2. Бэлгийн дур хүслээ ёс бусаар хангасан хүчирхийлэлд байсан

3. Сэтгэл санааны хүчирхийлэлд олон жил өртсөн

4. Эдийн засгийн хүчирхийлэлд олон жил өртсөн гэдэг үндэслэлээр яллагдагч Б.Эрдэнэсүхийг шалгуулах хүсэлтээ өмгөөлөгчөөрөө дамжуулан цагдаа, прокурорт өргөдөл гаргасан боловч зөвхөн бие махбодод нь халдсан гэх үндэслэлээр хэргийг боож дуусгангуутаа Б.Эрдэнэсүхийг суллажээ.

Б.Эрдэнэсүх өмнө нэг өмгөөлөгчтэй байсан бол одоо гурван өмгөөлөгчтэй болсон байна. Эрх мэдэлтэй, мөнгөтэй хүний эсрэг би өмнө тэмцээд дийлээгүй юм. Одоо ч дийлэхгүй гэдгээ ойлгож байна хэмээн О.Нарангарав хэллээ" мэдээллийг нийтэллээ.