Өчигдөр /2025.10.29/ Эрүүл Мэндийн Яаманд Эрүүл мэндийн салбарын цалин нэмэгдүүлэх шаардлагын хүрээнд МЭМАҮЭХ, Эрүүл мэндийн яам болон Хувийн хэвшлийн эрүүл мэндийн байгууллагуудын нэгдсэн холбооны төлөөлөл уулзалт зохион байгууллаа.

Энэхүү уулзалтын зорилго нь салбарын ажилтнуудын тавьсан шаардлагын дагуу нэмэлт гэрээ хэлэлцээрийг эхлүүлэх байсан юм.

МЭМАҮЭХ-ны дарга Ч.Нарантуяа хэлэлцээрийг орхиж гарсан ба тэрбээр:

“Ажилтнуудын тавьж буй шаардлагыг хэрэгжүүлэхийн тулд салбарын нэмэлт хэлэлцээрийн төслийг хэлэлцэхээр бид ЭМЯ-нд ирсэн. Гэвч яамны зүгээс бидний тавьсан 3.5 сая төгрөгийн цалингийн хэмжээг хэрхэн нэмэгдүүлэх тооцоо, тодорхой саналаа гаргаагүй, зөвхөн өмнөх шийдвэр буюу 15%-ийн нэмэгдэл дээр байр сууриа илэрхийлсэн. Иймд бид хэлэлцээрийг үргэлжлүүлэх боломжгүй гэж үзэн хэлэлцээрийн ширээнээс гарч ирсэн” гэлээ.

Энэ нь эрүүл мэндийн салбарын ажилчид амьдралын өртөгт нийцсэн бодит цалин, шударга үнэлэмж авах тэмцэл, шаардлага үргэлжилж байгааг харуулж байна.

Мөн ажил хаялт зарлахаар дараах 14 эмнэлэг хуралдаж байна.

• Баянзүрх дүүргийн эрүүл мэндийн төв
• Сонгинохайрхан дүүргийн өрхийн эрүүл мэндийн төвүүд
• Нийгмийн эрүүл мэндийн үндэсний төв
• Багануур дүүргийн эрүүл мэндийн төв
• Ховд аймгийн бүсийн оношилгоо эмчилгээний төв
• Дорноговь аймгийн нэгдсэн эмнэлэг
• Завхан аймгийн нэгдсэн эмнэлэг
• Хөвсгөл аймгийн нэгдсэн эмнэлэг
• Уламжлалт анагаах ухаан, технологийн хүрээлэн
• Сонгинохайрхан дүүргийн эрүүл мэндийн төв
• Баянхонгор аймгийн нэгдсэн эмнэлэг зэрэг эмнэлгүүд бүх ажилчдын хурлаа хийж, ажил хаялтад нэгдэхээ илэрхийлжээ.