Сүүлийн өдрүүдэд шатахууны түгээлт тогтворгүй байгаатай холбоотойгоор “шатахуун зарна”, “шатахуун хүргэлтээр зарж байна” гэх хуурамч зараар иргэдийг залилах тохиолдол нэмэгдэж байгааг цагдаагийн байгууллагаас анхаарууллаа.

Цагдаагийн байгууллагын мэдээлснээр, залилангийн гэмт хэрэг нь иргэдийн хэрэгцээ, итгэл үнэмшилд тулгуурлан үйлдэгддэг. Шатахууны хомсдол, хүлээлтийн байдлыг ашиглан бусдыг залилж буй тохиолдлууд бүртгэгдэж байгаа аж.

Одоогоор “шатахуун зарна” гэх нэрийн дор иргэдийг залилсан байж болзошгүй хэд хэдэн хэргийг шалгаж байгаа бөгөөд цагдаагийн байгууллагаас иргэдийг цахим сүлжээн дэх зар, мэдээлэлд итгэхээсээ өмнө сайтар нягтлах, баталгаагүй данс руу мөнгө шилжүүлэхгүй байхыг анхааруулж байна.