Хөвсгөл аймгийн Тариалан суманд сүүлийн хоёр сарын дотор гурван иргэн сураггүй алга болж, үүнээс хоёр настай хүүхдийн цогцсыг олоод байна. Харин тус аймгийн Тосонцэнгэл сумаас Тариалангийн нутаг дэвсгэрт самар түүхээр ирсэн 46 настай эмэгтэй, мөн Артархи багаас айлаас гараад сураггүй болсон эмэгтэй гээд хоёр иргэнийг эрэн хайж байгаа. Самарт явсан иргэний талаар "Хамтран амьдрагч нь хардаж хөнөөгөөд өөрөө амиа хорлосон байсан" гэх мэдээлэл байгаа ч цагдаагийн байгууллагаас үгүйсгэж буй. Хэрвээ эл мэдээлэл үнэн бол золгүй явдлууд дээр амиа хорлосон тохиолдол нэмэгдэх нь. Мөн нутгийн иргэдийн ярьж байгаагаар эдгээр явдлуудаас гадна нутгийн хайрхан дээр хоёр иргэн амиа хорлосон гэх мэдээлэл ч байна. 

Удаа дараалан тохиолдох учир битүүлэг золгүй явдлуудаас сэрэмжлэн иргэд нутгийн удирдлагууддаа лус аргадуулах хүсэлтийг удаа дараа гаргажээ. Ингэхдээ дийлэнх нь орон нутгийн зар мэдээлэл түгээдэг цахим хуудсаар дамжуулан хүсчээ.