Улаанбаатар хотын төвлөрлийг сааруулах, түгжрэлийг бууруулахаар 2022 оноос эхлэн хэд хэдэн албан байгууллага түрээсийн скүүтер болон дугуйн үйлчилгээг нэвтрүүлж эхэлсэн. Иргэд өөрт ойр байрлах цэгээс түрээсийн дугуй болон скүүтрийг аппликейшны тусламжтайгаар өдөр тутмын амьдралдаа хэрэглэж байна.

Тэгвэл хүйтний улирал эхэлж байгаа энэ үед түрээсийн скүүтер болон дугуйн үйлчилгээнүүд улирлын шалтгаанаас болж ирэх 11 дүгээр сараас үйл ажиллагаагаа түр зогсоох юм.

Энэ талаар НИТХ-аас тодруулахад, "Цахилгаан дугуй болон түрээсийн скүүтерийг энэ сарын 20-ноос дөрөвдүгээр сарын 20 хүртэл хязгаарлах шийдвэр гаргасан" гэлээ.

Скүүтер болон унадаг дугуйн тухайд 14 нас хүрээгүй тохиолдолд скүүтер болон унадаг дугуйтайгаар замын хөдөлгөөнд оролцохыг хориглодог байна. Түүнчлэн унадаг дугуй, цахилгаан скүүтер, мопед, мотоцикл унаж, авто замын хөдөлгөөнд оролцоход нэн түрүүнд нас, эрхийн үнэмлэх шаарддаг. Харин мопед унахад ямар нэгэн жолооны эрх шаарддаггүй бөгөөд 16-аас дээш насныхан унах боломжтой юм. Мөн 18 насанд хүрсэн, А ангиллын жолооны үнэмлэхтэй хүн мотоцикл унаж, замын хөдөлгөөнд оролцох эрхтэй билээ.