Говь-Алтай аймгийн Тонхил суманд чоно авлах болзолт уралдаан болно. Тодруулбал, аравдугаар сарын 14-нөөс 12 дугаар сарын 13-ны өдөр хүртэл сумын баг тус бүрт уралдааныг өрнүүлж, багийн дүнгээр хамгийн чоно авласан багууд шилдгээр тодорно. Уралдааныг сумын ЗДТГ-аас дүгнэж, I байр 3 сая, II байр 2 сая, III байр 1 сая төгрөгийн шагналтай. Мөн шилдгийн шилдэг нэг анчинг тодруулж өргөмжлөл, мөнгөн шагнал өгөх аж. Шагналын санг баг тус бүрийн мал бүхий өрхүүдээс бүрдүүлнэ. 

Монгол Улсын Засгийн газрын 2023 оны 260 дугаар тогтоолоор саарал чонын экологи эдийн засгийн үнэлгээг 1,130,000 (нэг сая нэг зуун гучин мянга) төгрөг гэж тогтоосон. Харин Байгалийн нөөц ашигласны төлбөрийн тухай хуулийн 22 дугаар зүйлийн 22.1.3-т заасны дагуу мал сүргийг хамгаалах болон тодорхой нутаг дэвсгэрт тоо толгойг сийрэгжүүлэх зорилгоор саарал чоно агнахад төлбөрөөс чөлөөлөх, хөнгөлөх боломжтой.