Засгийн газар багш нарын тавьсан шаардлагыг хангаагүй тул өнөөдрөөс /2025.10.16/  эхлэн ерөнхий боловсролын сургуулийн багш нар хугацаагүй ажил хаялт зарлалаа. Тэд цалин нэмэгдүүлэх, боловсролын салбарын санхүүжилтийг нэмэгдүүлэх, хөдөлмөрийн нөхцөлийг сайжруулах зэрэг шаардлагыг удаа дараа тавьсан ч удирдах албан тушаалтны зүгээс тодорхой шийдвэр гаргаагүй гэж үзэж байна.

Ажил хаялтад нийслэл болон орон нутгийн сургуулиудын багш нар нэгдэж, хичээл хаясан хөдөлгөөн улс даяар өрнөж байна. Багш нар “Боловсрол бол улс орны ирээдүй, багшийн хөдөлмөрийг үнэлэх цаг болсон” хэмээн уриалж байна.

Харин Боловсролын сайд П.Наранбаяр Засгийн газрын хуралдааны шийдвэрийг танилцуулахдаа “Ажил хаялт зарлаад байгаа Монголын үйлдвэрчний холбооны хүмүүст хандаж хэлэхэд, эдийн засгийн бололцоондоо тааруулж л ийм шийдвэр гаргаж байна. Шууд маргааш үндсэн цалинг 3.5 сая болгоно гэдэг Монгол Улсын эдийн засагт ямар ч боломжгүй. Ингэж нэмбэл 3.3 их наяд төгрөг дахиад нэмэх шаардлагатай болно. Бид гурван жилийн төлөвлөгөөгөө гаргаад жил болгон нэмэх замаар багшийн үндсэн цалинг 3.5 сая төгрөг болгоё гэж зориод байна. Ажил хаялтын тал дээр арбитр нь томилогдоод маргаан үргэлжлээд явж байгаа” гэсэн.

Ажил хаялтад нэгдсэн багш нар хичээл сургалтын үйл ажиллагаа зохион байгуулахгүй ч ажил дээрээ ирдгээрээ ирж байгаа аж.