СБД-ийн 13-р хорооны харьяат, 90 хувь хөдөлмөрийн чадвараа алдсан иргэн А.Оюунцэцэг энэ жил түлээ, нүүрсний хөнгөлөлтөө авч чадаагүй тухайгаа цахим хуудсаараа дамжуулан мэдээллээ.

Түүний хэлснээр, “Гавьяат” цол тэмдэгтэй учраас хөнгөлөлт болон урамшууллын аль нэгийг сонгож авах ёстой байдаг ч энэ жил хорооны халамжийн байцаагч “Та үнэхээр Гавьяат юм бол бичиг баримтаа авчирч, өөрийн биеэр ирж үзүүл” гэсэн шаардлага тавьсан байна. Харин иргэн А.Оюунцэцэг “Надад явах хоёр хөл байхгүй” хэмээн хариулжээ.

Гэсэн ч байцаагч “тэгэх журамтай болсон” гэж тайлбарласан байна.

Мөн иргэн өмнө нь хорооны даргад “Та муу ажиллаж байна, дандаа өөрийгөө сурталчилж байна” гэж хэлсний дараа түүнийг ямар нэгэн арга хэмжээнд дуудахгүй, “манай хорооноос яв” гэсэнтэй ижил хандлага үзүүлсэн гэжээ.

Тэрбээр “Хуультай, дүрэмтэй улсад амьдарч байгаа учраас хууль ёсны эрхээ л шаардаж байна” хэмээн байр сууриа илэрхийлсэн юм.