Хөдөлмөрийн аюулгүй байдал, эрүүл мэндийн төвөөс хөдөлмөрийн аюулгүй байдал, эрүүл ахуйн талаар иргэдийн мэдлэг, ойлголтыг нэмэгдүүлэх зорилгоор “Миний аюулгүй байдал – гэр бүлийн минь аз жаргал” сэдэвт гар зургийн уралдааныг зохион байгуулжээ.

Уралдаанд оролцогчдын шилдэг бүтээлүүдийг аюулгүй ажиллагааг сурталчлах хэвлэмэл материалд ашиглаж, олон нийтэд түгээж эхэлсэн байна.

Тухайлбал, “Миний гэр бүл аюулгүй ажилладаг” сэдвээр бүтээлээ туурвисан Дорнод аймгийн Хан-Уул цогцолбор сургуулийн 11 дүгээр ангийн сурагч П.Мөнхдэлгэр, мөн “Томужин алтернатив” сургуулийн 10 дугаар ангийн сурагч М.Номинжин нарын бүтээлийг онцлон сурталчилгааны материалд багтаажээ.

Энэхүү санаачилга нь хүүхэд, залуусын дунд хөдөлмөрийн аюулгүй байдлын соёлыг төлөвшүүлэх, гэр бүлийн гишүүдийн харилцан хариуцлагыг уриалах ач холбогдолтой гэж зохион байгуулагчид онцоллоо.