Өнөөдөр багш, эмч нар үндсэн цалинг нэмэгдүүлэх шаардлагаар нийслэлийн төв талбайд жагсаал зохион байгуулж байна. Тэд цалинг 3.5 сая төгрөгт хүргэх, ажилчдын нийгмийн асуудлыг төр анхаарахыг шаардаж байгаа аж.

Жагсагчдын хэлснээр, багш нар бага цалинтай ажилласнаас хичээл заах эрчмээ бүрэн дайчлах боломж хомс, сургалтын чанар буурч байна. Эмч нарын хувьд ачаалал их, халдварт өвчин, осол гэмтэлд өртөх эрсдэл өндөр боловч цалин болон нийгмийн баталгааны асуудал хангалтгүй байгааг онцолжээ.

Тэд цалин нэмэгдүүлэхийн зэрэгцээ ажиллах орчин, амралт, нийгмийн баталгааг сайжруулахыг шаардаж, салбарын шинэчлэл, хөдөлмөрийн үнэ цэнийг үнэлэхийг төр засгаас хүсч байна. Жагсаалд оролцогчид төрийн албан хаагчдын цалингийн бодлого, нийгмийн асуудлыг анхаарч, ажилчдын амьдралын чанарыг дээшлүүлэхийг уриаллаа.

Багш нарын тухайд төв талбайд тав дахь өдрөө жагсаж байгаа бөгөөд энэ сарын 15-нд шийдтэй хариу хэлэхгүй бол ажил хаялт зарлахаа мэдэгдээд байгаа юм.