НИТХ-ын төлөөлөгч, СБД-ийн 16-р хорооны Засаг дарга Б.Эрдэнэсүхийг гэр бүлээс хүчирхийллийн хэргээр шалгаж эхэлсэн талаар бид өмнө нь мэдээлсэн. Тэгвэл түүнийг өнгөрсөн баасан гарагт СБД-ийн 16-р хорооны засаг даргын ажлаас "Ажил үүргийн гүйцэтгэл хангалтгүй” гэсэн үндэслэлээр чөлөөлжээ. 

НИТХ-ын төлөөлөгч, СБД-ийн 16-р хорооны Засаг дарга Б.Эрдэнэсүхийг гэр бүлээс хүчирхийллийн хэргээр шалгаж эхэлсэн талаар мэдээлэл гарсны дараагаар Б.Эрдэнэсүхийн гэр бүлээс гадуурх харилцаанууд ил болсон билээ. Тодруулбал, Б.Эрдэнэсүх зөвхөн гэр бүлээс хүчирхийлэл үйлддэгээс гадна олны танил фитнесийн тамирчин эмэгтэйтэй гэр бүлээс гадуурх харилцаа үүсгэсэн байгааг түүний ойрын хүн нь хэлсэн мөн “СБД-ийн 16-р хорооны ажлын албаны Нийгмийн ажилтан Б.Олонбаяртай олон сар хамт амьдарч, нөхөртөө баригдсан” гэсэн мэдээлэл мөн тараад байсан юм.

                                   -Б.Эрдэнэсүхтэй холбоотой асуудал надад хамаагүй-

Бид уг асуудлаар, Нийгмийн ажилтан Б.Олонбаяраас тодруулга мэдээлэл авлаа. Тэрбээр, “Олон нийтийн сүлжээгээр тархаад байсан Б.Эрдэнэсүхтэй холбоотой асуудал надад хамаагүй. Тийм зүйл байхгүй. Одоогоор уг хэргээр цагдаагийн байгууллагад хандсан байгаа. Б.Эрдэнэсүх ч ажлаасаа чөлөөлөгдсөн” гэлээ.

Харин Б.Эрдэнэсүхийг СБД-ийн 16-р хорооны засаг даргын ажлаасаа чөлөөлөгдсөн эсэхийг СБД-ийн засаг дарга М.Алтангэрэл, “Өнгөрсөн баасан гарагт “Ажил үүргийн гүйцэтгэл хангалтгүй” гэсэн үндэслэлээр ажлаас нь чөлөөлсөн байна” хэмээв.