Нийслэлийн шүд эрүү нүүрний төв жилд 0-6 настай хүүхдийн тав, 7-18 настай хүүхдийн зургаан шүдийг үнэ төлбөргүй эмчилдэг. Мөн жирэмсний хяналтад байгаа эмэгтэйн бүх шүдийг, тоон хязгааргүйгээр ЭМД-аас үнэ төлбөргүй үзэж, эмчилж байна.

Харин эдгээрээс бусад бүх тохиолдолд төлбөртэй үйлчилгээ үзүүлдэг. Ингэхдээ Сангийн сайд болон Эрүүл мэндийн сайдын хамтарсан тушаалын дагуу тарифаар төлбөр тооцогдоно.

Дээрх үйлчилгээг авахдаа e-kart.mn сайтаар нэвтэрч, урьдчилж үзлэг, эмчилгээний цаг захиалах боломжтой болжээ. Ингэхдээ үзүүлэх өдрийнхөө өмнөх орой цаг авах юм байна. Тодруулбал, 20 цагаас үзлэгийн цаг олгож эхэлдэг болжээ. Онлайн цагийг нүүр амны мэс засал буюу шүд авалт, шүдний ломбо, сувгийн эмчилгээ хийлгэх өвчтөнд олгоно. Бусад тохиолдолд үзлэгийн цаг захиалах шаардлагагүй аж.