Монгол орны нэн ховор амьтны жагсаалтад орсон “Борцгор хотон” шувууны хошууг бусдад худалдаалах зорилгоор тээвэрлэж явсан үйлдлийг илрүүлэн шалгаж байна гэж Экологийн цагдаагийн албанаас мэдээллээ.

Тодруулбал энэ оны наймдугаар сард Говь-Алтай аймгийн Халиун сумын иргэн Б гэгч нь Нэн ховор амьтны жагсаалтад орсон "Борцгор хотон" шувууны хоёр ширхэг хошууг бусдад худалдаалах гэж байсан үйлдлийг илрүүлсэн. Улмаар мөрдөн шалгах ажиллагаа явуулсны дүнд эрүүгийн хэрэг үүсгэж яллагдагчаар татан прокурорын байгууллагад шилжүүлжээ.

Эрүүгийн хуулийн 24.5 дугаар зүйлийн 2-т Нэн ховор амьтныг тусгай зөвшөөрөлгүй агнасан, барьсан, зориудаар гаршуулан тэжээсэн, амьдрах орчныг алдагдуулсан тэдгээрийн түүхий эдийг бэлтгэсэн, тээвэрлэсэн, хадгалсан, худалдсан, худалдан авсан, гадаад улсад гаргасан, нэн ховор амьтны чихмэл, түүхий эд, эд, эрхтэн, тэдгээрийн гаралтай түүхий эдийн цуглуулга хийсэн бол 10-40 сая төгрөгөөр торгох, эсхүл 2-8 жил хүртэл хугацаагаар хорих ял шийтгэнэ гэж тус тус заасан. Амьтны экологи-эдийн засгийн үнэлгээгээр “Борцгор хотон” шувуу нь 11,790,000 төгрөгөөр үнэлэгдэх тул энэ дүнг хоёр дахин нэмэгдүүлсэнтэй тэнцэх хэмжээгээр хохирлыг төлүүлэх аж.