Архангай аймаг дахь АШУҮИС-ийн Сувилахуйн сургууль 2025-2026 оны шинэ хичээлийн жилийн нээлтээ амжилттай зохион байгууллаа. Аймгийн Нэгдсэн эмнэлгийн хуучин байрыг шинэчлэн ашигласнаар тус сургуулийг байгуулах санаачилга бодит ажил болж, Архангай аймагт сувилахуйн сургалт, эрдэм шинжилгээ, эрүүл мэндийн тусламж үйлчилгээний цогцолбор албан ёсоор байгуулагдлаа. Хангайн бүсийн АШУҮИС-ийн Сувилахуйн сургалт, эрдэм шинжилгээ, эрүүл мэндийн тусламж үйлчилгээний цогцолбор нь 7 хөтөлбөрөөр элсэлт авч, шинэ хичээлийн жилээ эхлүүлж байна. Үүнд:

• Сувилагч

• Уламжлалт анагаахын сувилагч

• Эм найруулагч

• Нүүр амны техникч

• Нүүр амны эрүүл ахуйч

• Эмнэлзүйн лабораторийн технологич

• Дүрс оношлогооны техникч

Ийнхүү үйл ажиллагаагаа эхлүүлснээр Хангайн бүсийн эрүүл мэндийн салбарт тулгамдаж буй эмнэлгийн мэргэжилтнүүдийн хангамжийг сайжруулж, бүс нутгийн эрүүл мэндийн хөгжлийн чухал түшиц сургууль болох юм. Мөн Архангай аймагт АШУҮИС-ийн Монгол анагаах ухааны эмнэлэг, Нүүр ам судлалын эмнэлгийг байгуулан, үйл ажиллагааг нь эхлүүлээд байна.