Швейцарийн Лозанн хотод төвтэй Олон улсын удирдлагын хөгжлийн хүрээлэн (IMD)-гээс гаргасан “World Talent Ranking 2025” тайланд Монгол Улс 69 орны дунд 69-дүгээр байр эзэлжээ.

Энэхүү тайлан нь улс орнуудын авьяас чадварын хөгжлийг боловсролын хөрөнгө оруулалт, хүний нөөцийн ур чадвар, хөдөлмөрийн зах зээлийн өрсөлдөх чадвар, мэргэжилтнүүдийг тогтоон барих нөхцөл боломж зэрэг үндсэн шалгуураар үнэлдэг. Монгол Улс дээрх үзүүлэлтүүдийн нийлбэр дүнгээр хамгийн доод байр буюу 69/69 болсон байна.

Судалгааны багийн тайлбарласнаар Монгол Улсад авьяас чадвараа хөгжүүлэх тогтолцоо, өндөр ур чадвартай боловсон хүчнийг дэмжих бодлого хангалтгүй, мөн өрсөлдөхүйц орчны дутагдалтай хэвээр байгаа нь ийнхүү хамгийн доод үзүүлэлтэд хүргэжээ.

Харин жагсаалтын эхний гуравт Швейцарь, Люксембург, Исланд улсууд багтсан бол Ази тивээс Сингапур, Хонконг, Тайвань хамгийн өндөр байр эзэлсэн байна.