Улаанбаатар хотын нутаг дэвсгэрт хар тамхи худалддаг 2 бүлгийг ЦЕГ-ын Хар тамхитай тэмцэх газар энэ оны 9-р сарын 4-5-нд шилжих шөнө илрүүлэн, баривчиллаа. Тэднийг хар тамхиа бусдад худалдаж байхад нь үйлдэл дээр нь баривчилсан байна.

Уг 2 бүлгийн 11 гишүүнээс Хар тамхитай тэмцэх газрын ажилтнууд 4 төрлийн бодис, хэрэглүүр, бэлэн мөнгө, 11 гар утас, 6 машиныг эд мөрийн баримт болгон хураан авчээ. Тэдний бие, машинаас хураан авсан бодис нь НҮБ-ын 1971 оны “Сэтгэцэд нөлөөт бодисын тухай конвенц”-ын 2-р жагсаалтад багтсан мансууруулах эм, сэтгэцэд нөлөөт бодис аж. Тэдэнд мансууруулах эм, сэтгэцэд нөлөөт бодис хууль бусаар олж авсан, хадгалсан, бусдад худалдан борлуулсан хэргээр эрүүгийн хэрэг үүсгэн шалгаж байна.

Энэ хэрэгт холбогдсон этгээдүүд бүгд 30-аас дээш насныхан. Тэд өмнө нь ийм хэргээр ял шийтгүүлж байжээ. Эдгээр 11 этгээдийн 2 нь эмэгтэй. Хар тамхины хэрэгт эмэгтэйчүүд холбогдох нь нэмэгдэж байгаа аж.