Монголын хойд хэсэгт орших жуулчны газарт гэрэл зураг авхуулж байгаад 20 гаруй насны Солонгос жуулчин эмэгтэй галт уулын тогоонд унаж, нас баржээ.  

Энэ талаар ЦЕГ-аас тодруулахад, "Цагдаагийн байгууллагад өнгөрсөн наймдугаар сарын 28-ны өдөр Архангай аймгийн Тариат сумын нутагт байх Хоргын тогоо гэх газарт БНСУ-н иргэн унаж нас барсан гэх дуудлага мэдээлэл бүртгэгдсэн. Амь хохирогч нь манай улсад аялал жуулчлалын шугамаар наймдугаар сарын 20-ны өдөр ирсэн байна. Шалтгалтын ажиллагааг Архангай аймгийн цагдаагийн газар үргэлжлүүлж байгаа" гэж мэдээллээ.

Харин Солонгосын ГХЯ-наас есдүгээр сарын 7-нд мэдээлэхдээ, "Тэр галт ууланд гэрэл зураг авахуулж байгаад гэнэтийн хүчтэй салхинд тэнцвэрээ алдаж унасан гэж таамаглаж байна. Яг нөхцөл байдлыг орон нутгийн удирдлагуудтай хамтран шалгаж байна" гэсэн байв.