Нийгмийн даатгалын ерөнхий газар Нийгмийн даатгалын үндэсний зөвлөлийн тогтоолын дагуу сангийн чөлөөт үлдэгдлийг арилжааны банкуудад байршуулах ажлыг зохион байгуулж буй.

Үүний хүрээнд банкны системд нөлөө бүхий дөрвөн арилжааны банкинд нийт 700 тэрбум төгрөгийг нэг жилийн хугацаатай, жилийн 15 хувийн хүүтэйгээр хадгалуулжээ.

Ингэснээр 2025 оны наймдугаар сарын хүү болох 8.9 тэрбум төгрөгийн орлогыг санд хүлээн авсан аж. Энэ нь нийгмийн даатгалын сангийн хөрөнгийг арвижуулах чухал эх үүсвэр болжээ. Өмнө нь 5, 6, 7 дугаар сарын хүүгийн орлого болох 26.1 тэрбум төгрөгийг санд төвлөрүүлсэн бөгөөд одоогийн байдлаар нийт 35 тэрбум төгрөгийн хүүгийн орлого хүлээн аваад байна.

Хадгаламжийн хугацаанд нийтдээ 105 тэрбум төгрөгийн хүүгийн орлого олох тооцоо гарчээ.

Хуулийн дагуу нийгмийн даатгалын сангийн чөлөөт үлдэгдлийг найдвартай, үр өгөөжтэй, ил тод байдлаар зөвшөөрөгдсөн санхүүгийн хэрэгсэлд хөрөнгө оруулж болохыг Нийгмийн даатгалын ерөнхий газар онцолж байна.